फिशरमॅन व्हिलेज

       लॉकडाऊनच्या 8 महिन्याच्या तुरूंगवासानंतर फायनली शहराच्या बाहेर कुठेतरी फिरायला संधी मिळाली. निमित्त होतं दिवाळी सुट्टीचं. एवढ्या महिन्यानंतर पिकनिकचा प्लॅन करायचा यातच अधिकतर उत्सुकता होती. नुसतं कल्पनेनंच मन भरून आलेलं.. ही जरी अतिशयोक्ती वाटत असली तरी आत्ताची वस्तुस्थिती पाहता बहुतांशी जणांची तरी हीच भावना असणार. 

       दिवाळी सुट्टी आणि चिल्ड्रन डे यांचं औचित्य साधून आम्ही फॅमिली पिकनिकला जाण्याचा प्लॅन केला. कोरोनाची भिती होतीच  पण इतके महिने घरात बसून मनावर आलेलं दडपण, थकवा हा जास्त होता, म्हणून प्रत्येकाने स्वत:ची पूर्ण काळजी घ्यायची असं ठरवून पिकनिकला जायचं पक्कं केलं. त्यासाठी अगदी जवळचंच ठिकाण निश्चित केलं, ते म्हणजे 'फिशरमॅन व्हिलेज.'

 

 

       पालघरमधल्या सफाळे येथे हे रिसॉर्ट आहे. सफाळे रेल्वे स्टेशनपासून अवघ्या 20 मिनीटांच्या अंतरावर हे रिसॉर्ट असल्याने प्रवासाचीही काही अडचण नाही. कारने जायचे असल्यास विरारपासून अवघ्या दीड तासात आपण येथे पोहोचतो. इकडे बुकिंगला मात्र अडचणी येतात. त्यामुळे साधारण महिनाभर आधी बुक केलेलं उत्तम. 

     या रिसॉर्टचा परिसर अतिशय निसर्गरम्य आहे. सूर्योदय आणि सूर्यास्त अशा  दोन्ही मनमोहक दृश्यांचा आनंद आपण  या ठिकाणी अनुभवू शकतो. आजूबाजूला सुरूची झाडे, तलाव आणि स्विमिंगपूल या सौदर्यांत अधिक भर घालतात. इकडच्या घरांची रचना ही अतिशय कल्पक आणि खूप सुंदर आहे. 

       गेटमधून आत जाताच समोर खुप मोठा तलाव पाहायला मिळतो. चहूबाजुंनी सुरूच्या झाडांनी वेढलेला, तलावामध्ये  ब्रिज या सर्वाचं तलावात पडलेलं प्रतिबिंब अहाहाहाह!!! अप्रतिम दिसते हे दृष्य... या तलावामध्ये फिशिंग आणि बोटिंग करण्याची सुविधा असल्यामुळे खऱ्या अर्थाने आपल्याला या तलावाचा आनंद लुटता येतो. (या तलावात पोहण्यास मनाई आहे. त्यासाठी विशेष जलतरण म्हणजे स्विमिंगपूलची व्यवस्था केली आहे. 😄.)  तलावाच्या काठाशीच सर्व घरं वसवलेली आहेत. त्यामुळे प्रत्येकांना तलावाचे मनमोहक दृश्य म्हणजे सुर्योदय आणि सुर्यास्त पाहता येतो... खूप प्रसन्न वाटते त्यामुळे. 

 

       रिसॉर्टमध्ये खऱ्या गावाचा फिल येण्यासाठी येथील घरं जशी आपल्याला आकर्षित  करतात तशीच इकडे असलेला बैलगाडा, कोंबडे आणि बदकंही आपलं लक्ष वेधून घेतात. या सगळ्याबरोबर आणखीन एक वैशिष्ट्यपूर्ण गोष्ट आहे ती म्हणजे येथील स्विमिंगपूल... हे स्विमिंगपूल मिनी ऑलिम्पिक स्विमिंगपूलच्या आकाराचे असून त्यासाठी  जवळपास 1 करोड हून अधिक  खर्च केवळ स्विमिंगपूलवर करण्यात आला आहे. लहान मुलांसाठी ही वेगळा सेक्शन ठेवलेला आहे.

 

       सरतेशेवटी अगदी महत्त्वाचं म्हणजे पेटपूजा.... निसर्ग पाहून मन प्रसन्न होते.  पण पोटाचा उदरभरणा करण्यासाठी चविष्ट जेवणाची खमंग साथ ही हवी असतेच. सो येथे व्हेज आणि नॉनव्हेज अशा दोन्ही प्रकारच्या जेवणाची व्यवस्था असते. जेवण हे आपल्या पॅकेज मध्ये सामावलेले नसते. आपण ते ऑर्डरनुसार  मागवू शकतो. सकाळचा नाश्ता मात्र पॅकेजमधून दिलेला असतो.

       आता या रिसॉर्टची कथा... मुद्दाम शेवटी सांगतेय. हे सगळं साम्राज्य उभं करणे  आणि  अल्पावधीत लोकप्रियतेच्या शिखरावर पोहोचणे सामान्य गोष्ट नाहीये.  मिस्टर राठोड यांची ही प्रॉपर्टी आहे. कोलंबी प्रकल्पापासून सुरूवात केलेल्या या प्रकल्पाचे रूपांतर रिसोर्टमध्ये करण्यात त्यांना यश आलं आहे. राठोड यांनी 15 वर्षांपूर्वी या जागेवर 7 मानवनिर्मित तलाव खोदले व त्यामध्ये कोलंबी प्रकल्प सुरू केला. कालांतराने त्यांनी एका तलावाच्या शेजारी चार घरं बांधून या प्रकल्पाला हात घातला.. त्यामधून जे पैसे मिळाले त्यातून आणखीन चार घरं बांधली.. असे करत करत त्याठिकाणी त्यांनी तलावाच्या कडेलाच जवळपास 13-14 घरं बांधत आपला प्रपंच वाढवला.  

       ज्याठिकाणी स्विमिंगपूल बांधण्यात आले आहे. तिकडे सुद्धा तलाव होता. हा तलाव बुजवून  पुन्हा आवश्यकतेनुसार स्विमिंगपूल बांधला आहे.. मागच्या बाजूला तलाव आणि समोर स्विमिंगपूल पाहताना खुप छान वाटते. या स्विमिंगपूलच्या बाजुला आणखीन दोन घरांचे बांधकाम सुरू आहे. तसेच तलावाच्या मधोमध रेस्टॉरंट बांधण्याचे काम हाती घेतलं आहे. थोडक्यात, हे रिसॉर्ट आणखीन डेव्हलपमेंट झोन मध्ये आहे. 

(😍😍अतिमहत्त्वाचं म्हणजे फोटोशुटसाठी हे लोकेशन बेस्ट, बेस्ट, सॉलिड बेस्ट लोकेशन आहे.😍😍 )